Bakgrunn Luster kommune skal etablere eit nytt høgdebasseng med tilhøyrande infrastruktur. Prosjektet omfattar arbeid i eit område med krevjande tilkomst og avgrensa rigg- og logistikkmoglegheiter. Det må takast særleg omsyn til terreng, verna område og gjennomføring i område utan ordinær vegtilkomst. For leverandørane er det derfor viktig å forstå at oppdraget krev relevant erfaring med teknisk komplekse anlegg, koordinering av transport og gjennomføring under krevjande lokale forhold. Denne kunngjeringa gjeld prekvalifisering av entreprenørar. Nærare opplysningar om prosjektet og endeleg oppdragsomtale vil bli gjort tilgjengeleg for dei leverandørane som blir prekvalifiserte, etter signert teieplikterklæring. Beskrivelse av oppdraget Luster kommune ønskjer å prekvalifisere entreprenørar til eit kommande oppdrag som i hovudtrekk omfattar prosjektering, levering, etablering og ferdigstilling av nytt høgdebasseng med tilhøyrande anleggsarbeid. Leveransen skal resultere i ei komplett og operativ løysing for vassforsyning. Oppdraget omfattar mellom anna levering og etablering av komplett høgdebasseng, nødvendige grunn- og terrengarbeid, legging av vassleidning frå borehol til eksisterande fellesleidning, samt etablering av kabelgrøfter og trekkerøyr mellom sentrale tekniske punkt i anlegget. Arbeidet omfattar òg tilhøyrande tiltak som vegetasjonsrydding, handtering av utfordrande grunnforhold og nødvendig samordning mot lokalt energiverk. Gjennomføringa vil vere særleg krevjande fordi delar av anlegget ligg i område med vanskeleg tilkomst, avgrensa riggplass og krav til skånsam gjennomføring. Transport av basseng og materiale til bassengtomta må planleggjast med helikopterløft. I delar av grøftetraseen skal arbeidet utførast nær eksisterande leidningar og kablar som må haldast i drift medan arbeidet går føre seg. Prekvalifiseringa vil vere retta mot leverandørar som kan dokumentere relevant erfaring, tilstrekkeleg kapasitet og god forståing for gjennomføring av anlegg i utilgjengeleg terreng. Oppdragsgivar vil i vurderinga leggje vekt på erfaring frå tilsvarande prosjekt, kompetanse og leverandøren si skildring av korleis oppdraget er tenkt gjennomført. Det vil ikkje bli gjennomført synfaring i samband med prekvalifiseringa. Nærare prosjektinformasjon og eventuell synfaring vil bli aktuelt i neste fase for dei leverandørane som blir inviterte vidare i konkurransen. Planlagt oppstart er fyrste kvartal 2027, med atterhald om finansiering og nødvendige løyvingar.